Image

सरकारमा जाने बारेमा राजपामा चर्कियो विवाद

काठमाडौँ, संविधान संशोधनको सुनिश्चिता विना सरकारमा सहभागी हुन खोजेको भन्दै राष्ट्रिय जनता पार्टी (राजपा)मा विवाद सृजना भएको छ ।

लामो समयदेखि संविधान संशोधनका लागि संघर्ष गरेको तर त्यही विषयको सुनिश्चितता नभई सरकारमा सहभागी हुन नहुने भन्दै राजपा भित्रका धेरै नेताहरु सरकारमा सहभागीताको विपक्षमा उभिएका छन् ।

संविधान संशोधनकै लागि केही व्यक्ति सहिद भएको, सयौं घाइते भएको र पछिल्लो निर्वाचनमा पनि त्यसैका लागि जनताले मत दिएकाले संशोधनको सूनिश्चीतता विना सरकारमा जान नहुने मत राजपामा बढ्दै गएको छ ।

पर्सा चारबाट निर्वाचित राजपा सांसद समेत रहनु भएका लक्ष्मणलाल कर्णले भन्नुभयो, संविधान संशोधनकै लागि हामीले मत प्राप्त गरेको हो, त्यसैले हामीले संविधान संशोधन भई सरकारमा जानु हुदैन ।

उहाँले संविधान संशोधनको माग गर्दा कैयौं सहिद भएको र कैयौं घाइते भएकाले उनीहरुको सपना पुरा नगरी सरकारमा गएर मोज गर्न नहुने तर्क गर्नुभयो ।

उहाँले संविधान संशोधन र मधेश आन्दोलनमा सहभागीका मुद्धा फिर्ता नभई सरकार गए जनता माथी कुठाराघात हुने पनि बताउनु भयो ।

एमाले र माओवादी केन्द्रको गठबन्धनले आफ्ना मागहरु पुरा गर्ने संभावना नदेखिएकाले अहिले सरकारमा सहभागी हुने वातावरण नभएको कर्णको भनाई छ ।

सरकारलाई समर्थन गर्नु र सरकारमा सहभागी हुनु फरक हो भन्दै उहाँले सरकारलाई समर्थन गर्न सकिने तर सहभागी हुन नसकिने स्पष्ट पार्नु भयो ।

भिडियो हेर्नुहोस् :

  • २७ फाल्गुन २०७४, आईतवार ०९:३२
  • 3965 Views