विश्वकप क्रिकेटमा न्यूजिल्याण्डको लगातार तेस्रो जित

  • २६ जेष्ठ २०७६, आईतवार १७:४०
  • 871 Views
radionrn

काठमाडौं । इङ्ल्याण्डमा जारी एकदिवसीय विश्वकप क्रिकेटमा न्यूजिल्याण्डले लगातार तेस्रो जित हात पारेको छ ।गएराति भएको खेलमा अफगानिस्तानलाई ७ विकेटले पराजित गर्दै न्यूजिल्याण्डले आफ्नो शतप्रतिशत विजयी यात्रा कायम राखेको हो ।

अफगानिस्तानले दिएको १ सय ७३ रनको सामान्य लक्ष्य न्यूजिल्याण्डले ३२ ओभर १ बलमा ३ विकेट गुमाएर पुरा गर्‍यो ।उसका लागि कप्तान केन विलियाम्सनले अविजित ७९ रन बनाउँदा रोस टेलरले ४८ रनको योगदान दिए ।

यसअघि टस हारेर पहिले ब्याटिङ गरेको अप्mगानिस्तानले ४१ ओभर १ बलमा अलआउट हुँदै १ सय ७२ रन बनाएको थियो । अफगानिस्तानका लागि हस्मतउल्लाह साहिदीले ५९ रन जोडे ।

बलिङतर्फ न्यूजिल्याण्डका जेम्स निशमले ५ विकेट तथा लोकी फर्गुसनले ४ विकेट लिए । जितसँगै ३ खेलबाट ६ अंक जोडेको न्यूजिल्याण्ड तालिकाको शीर्ष स्थानमा उक्लिएको छ । अफगानिस्तानको भने यो लगातार तेस्रो हार हो ।

विश्वकप क्रिकेटकै अर्को खेलमा इङ्ल्याण्डले बंगलादेशलाई १ सय ६ रनको फराकिलो अन्तरले हराएको छ । वेल्सको कार्डिफमा इङ्ल्याण्डले दिएको ३ सय ८७ रनको विशाल लक्ष्य पछ्याएको बंगलादेश ४८ ओभर ५ बलमा अलआउट हुँदै २ सय ८० रनमा समेटियो ।

बंगलादेशका लागि शकिब अल हसनले १ सय २१ रनको शतकीय इनिङ्स खेले पनि टोलीलाई जिताउन सकेनन् ।यसअघि टस हारेर पहिले ब्याटिङ गरेको इङ्ल्याण्डका जेसन रोयले १ सय ५३ रनको विस्फोटक ईनिङ खेलेपछि इङ्ल्याण्डले ३ सय ८६ रन बनाएको थियो ।

इङ्ल्यान्डका लागि जोस बट्लरले ६४ रनको योगदान दिए । जितसँगै इङ्ल्याण्डले ३ खेलबाट ४ अंक जोडेको छ । बंगलादेशले भने ३ खेलमा २ अंक मात्रै जोडेको छ ।

Avatar

Next Story